Adat

INTISARI ADAT

Panakiek pisau sirauik

Ambiak galah batang Lintabuang

Silodang ambiak kaniru

Nan satitiak jadikan Lauik

Alam Takambang Jadikan Guru

Pisang gadang pisang Tambatu

Dibawo urang ka Taluak Bayua

Dimakan anak dari Salido

Rumah gadang basandi batu

Adat basandi alua

Alua nan kaganti Rajo

Adat babarieh babalabeh

Baukua jo bajangko

Tungku nan Tigo sajarangan

Partamo banamo alua patuik

Kaduo banamo anggo tango

Katigo banamo raso pareso

Nan kuriak iyolah Kundi

Nan merah iolah sago

Nan baiak iyolah Budi

Nan Indah iyolah baso

Kuek rumah dek basandi

Rusak sandi rumah binaso

Kuek bangso karano budi

Rusak budi bangso binaso

Apo nan dikatoan ADAT

Nan dimakasuik jo adat iolah paraturan tantang kehidupan sahari-hari. Bagi urang minang sagalonyo ado aturan, baiak makan, minum, duduak tagak, mangecek, bapakaian sagolo nan manyangkuik kesitu ado adaiknyo. Mako dikatokanlah urang nan indak mampunyai aturan disabuik tidak baradaik.

Aturan-aturan itu biasonyo indak tatulis, hanyo disampaikan sacaro pepatah jo petitih. Baa baitu, karano urang minang basifat lamah lambuik, ndak namuah dikasai, mudah tasingguang. Iko salah satu contohnyo :

Batanyo lopeh orak

Barundiang sudah makan.

Makasuiknyo : Kalau ado urang nan batamu karumah kito, talabiah dahulu kito suguahkan minuman, atau panganan, kalau bisa atau sangguik dibori makan dahulu, baru satalah salasai mako di tanyo apo mukasuik kadatanganyo. Itulah sekadar contoh ketek dari pepatah petitih nasehat.

Contoh lain misalnyo :

Bajalan ba nantuo

Balayia ba nakhodo

Mukasuiknyo : kalau awak mangutus seseorang untuk menyampaikan hajat misalnyo untuak maminang, atau juo untuak bajalan jauah paralu adonyo pimpinan atau disabuik juo jo kapalo rombongan. Mako kapalo itulah nanti nan akan manjadi pembicara atau nan akan manyampaikan mukusuik. Baa baitu karano nan tuo itu dianggap urang nan alah banyak pangalaman nan alah banyak manginyam paik manihnyo hidup, dan juo alah banyak baraja ka nan alah tajadi.

Urang nan dikatoan arif bijaksano dikiaskan jo pantun barikuik :

Nan tau condong kamaimpok

Nan tau lantiang kamanganai

Nan tau jo ereng gendeng

Nan tau jo baso basi.

Tau dibayang kato sampai

Alun bakilek lah bakalam

Salayang ikan dalam aia

Lah jaleh jantan batinonyo.

Tau diangin nan basiru

Tau jo lauik nan sadidiah

Tau dikarang nan balaungguak

Tau jo ombak nan badabua.

Label

Adat